اوشاقلار باغچاسی / ۴/ حبيب فرشباف

«يالانچي‌ چوبان‌»

 سحر- سحر بير چوبان‌

داغا ديرماشماق‌ همان‌

 اَلين‌ قويوب‌ قولاغا

چيغيراردي‌ اوجادان‌

 ـ قورد آپاردي‌ قويونو

تئز گلين‌ آي‌ جاماعات‌!

 قويمايين‌ هَده‌ر اولسون‌

يازيقدير بو حيوانات‌!

 

الَه‌ آغاجي‌ گَلن‌

 اوز قويارديلار داغا،

 اونلاري‌ گؤره‌ن‌ چوبان‌

باشلاياردي‌ گولماغا،

 ـ اَده‌ هارا گليرسيز؟

من‌ ظارافات‌ ائديرديم‌

 بير تولكويموش‌ گؤردويوم‌

من‌ اؤزومو ايتيرديم‌.

 

هر گون‌ يالانچي‌ چوبان‌

 اوتاراركن‌ قويونو

 كندلي‌لرين‌ باشينا

 آچاردي‌ بو اويونو.

 

 بير گون‌ يالانچي‌ چوبان‌

سحر داغا ديرماشدي‌،

 قويونلار قاباغيندا

 اوكنددن‌ اوزاقلاشدي‌،

 نئچه‌ جاناوار بيردن‌

ديرماشديلار دره‌دن‌،

 چوبان‌ چيغيردي‌ هاراي‌ !

آي‌ جاماعات‌ گلين‌ هاي‌!

 هر كس‌ ائشيتدي‌ سسين‌

سؤيدو اونون‌ دده‌سين‌

 ـ فیلان‌، فیلان‌ گؤره‌سن‌

يئنه‌ نه‌ قورقو قوروب‌،

 قارا قويون‌ سوتوندن‌

يئييب‌ چؤلده‌ قودوروب‌.

 

 بير نفرده‌ گلمه‌دي‌

چوبانين‌ كؤمه‌گينه‌،

 چوبان‌ دؤرد جاناوارا

نه‌ ائله‌سين‌ تكينه‌؟

 جاناوارلار بير آندا

سورويه‌ داراشديلار

 بئشين‌ بوغوب‌ دؤردون‌ ده‌

گؤتوردولر قاشديلار

  

 «باجاريق‌» 

 بنؤشه‌نين‌ آتاسي‌

اونا دؤرد شيرني‌ وئردي‌،

 اؤز بالاجا باجين‌لا

آپار ياري‌ بؤل‌ - دئدي‌!

 بنؤشه‌ده‌ گؤتوردو

شيرني‌‌نین اوچ‌ ايري‌سين‌،

 او خيردا باجي‌سينا

وئردي‌ تكجه‌ بيري‌سين‌.

 آتاسي‌ بونو گؤروب

‌ سوروشدو بنؤوشه‌دن‌

 - قيزيم‌ بس‌ سن‌ سايماغي‌

باجارماييرسان‌ نه‌ دن‌؟!

 بنؤوشه‌ آتاسينا

جاواب‌ وئردي‌ سئوينجك‌:

 آتا! من‌ باجاريرام‌

 باجارمايير بو چيچك‌

 

 «مدرسه‌دن‌ گلنده‌» 

 قاييداركن‌ مدرسه‌دن‌

سالام‌ وئرديم‌ آتاما من‌؛

 آتام‌ دئدي‌: قيزيم‌ گلدين‌؟

 سؤيله‌ گؤروم‌ نه‌ اؤيرندين‌؟

 دئديم‌: آتا بير قولاق‌ آس‌ !

فارسلار دئيير اوراغا، داس‌.

 اؤيرنميشم‌ اَليف‌ بِ يي‌،

 اوخويورام‌ من‌ هر شئيي‌،

 بو بابادير، باخ‌ بودا آب‌

 بوآت‌ بو ديش‌، بودا جوراب‌؛

 اؤيرنميشم‌ بخش‌ ائتمه‌يي،‌

دئييرسن‌سه‌، دة‌ هر نه‌يي‌.

 اللريم‌له‌ پارچالارام‌،

سسلريني‌ من‌ سايارام‌؛

 سسلر ديَجَك‌ قولاغيما

گتيره‌رم‌ بارماغيما.

 

 آتام‌ دئدي‌: «بو آلماني‌

 بير پارچالا گوروم‌ هاني‌؟»

 آلمالاري‌ گؤره‌ن‌ چاغي‌

گتيرديم‌ من‌ تئز پيچاغي،‌

 بونو گؤرجك‌ آتام‌ گولدو ،

ائله‌ گولدو، ائله‌ گولدو

 گؤزلريندن‌ ياش‌ تؤكولدو؛

 دئدي:‌ قيزيم‌ كلاسدا سن‌

 ائله‌ بئله‌ بخش‌ ائديرسن‌؟!

 اؤز يئريمده‌ دايانديم‌ من‌،

 آتامدان‌ برك‌ اوتانديم‌ من‌.

 

 

 

«آتا بير چرخ‌ آل‌ منه‌» 

 ـ آتا! بير چرخ‌ آل‌ منه‌
 احمدين‌ چرخلريندن‌،
 يَهري‌ آلچاق‌ اولسون‌
 اؤزوم‌ سوره‌ بيليم‌ من‌!


 ـ اوغول‌ نئچه‌ يول‌ دئييم‌؟
 دئميشم‌ كي‌ آلارام‌،
 آي‌ باشي‌ ياخينلاشير
 بير آز دؤز پوللانارام‌.


 ـ منه‌ هئي‌ سؤز وئريرسن‌
  آلماييرسان‌ آتاجان‌!
  قورخورام‌ كي‌ يئنه‌ده‌
  سنين‌ چيخسين‌ ياديندان‌.
  ايسته‌ميرم‌ آي‌ باشين‌
  ائله‌ بو گون‌ آل‌ دئديم‌،
  قوي‌ ايندي‌ده‌ اوشاقلار
  ايتَه‌له‌سين‌ من‌ گئديم‌.


 بير قده‌ر فيكيرله‌شيب‌
 آتا قالخيزدي‌ باشين،‌
 او گؤرمك‌ ايسته‌ميردي‌
 بالاسي‌نين‌ گؤز ياشين‌،
 بير سيگار آليشديريب‌
 آتا گئتدي‌ ايشينه‌،
 هيچ‌ بيلمه‌دي‌ او گونو
 فيكري‌ نه‌دير؟ ايشي‌ نه‌؟
 ـ اوغلوم‌ قوي‌ ياتسين‌، دئيه‌
 گئجه‌ اؤزون‌، يوباتدي‌،
 قيچلاري‌ گلر - گلمَز
 گليب‌ ائوينه‌ چاتدي؛‌
 ائهمال‌ آچيب‌ قاپيني‌
 گليب‌ گيردي‌ يئرينه‌
 بيردن‌ گؤزو ساتاشدي‌
 اوغلونون‌ گؤزلرينه،‌
 زول‌ - زول‌ اونا باخاراق‌
 نه‌ ديندي‌، نه‌ دانيشدي‌،
 آتاسي‌نين‌ اوره‌يي‌
 ياندي‌ - ياندي‌ آليشدي‌.

 

 «تاپماجا» 

 نه‌ اَتي‌ وار، نه‌ قاني‌،
 سن‌ اونا يولداش‌ اولسان‌
 آپاريب‌ دولانديرار
 قاريش‌ - قاريش‌ دونياني‌.
 نه‌ آغلايار نه‌ گولر
 سني‌ گاهدان‌ آغلادار
 سني‌ گاهدان‌ گولدور‌ر
 نه‌ ده‌ سوروشسان‌ سوروش‌
 سنه‌ دوز جاواب‌ وئره‌ر.

 

«وطن‌» 

 دؤيوشدولر ايكي‌ كَل‌،

 ياش‌ بير، گوج‌ بير، بير هئيكل‌.

 ووروشدولار

 دوروشدولار

 هر ايكيسي‌ دايانديلار

 بوتون‌ قانا بويانديلار

 بير يوروش‌له‌

 بيردن‌ - بيره‌،

 آغ‌ كَل‌ ويريب‌،

 قارا كلي‌ سردي‌ يئره‌!

 هورا چكدي‌، چپيك‌ چالدي‌

 كل‌ يي‌يه‌سي‌ سئويندي‌؛

 كيمي‌ دئدي‌:

 آي‌ بخته‌ور

 گئت‌ كليني‌ سئو ايندي‌!

 ياريش‌ بئله‌ سوناچاتدي‌،

 «آغ‌» دؤيوشو آپاردي‌.

 اودوزانلار اعتراضلا،

 بيردن‌ هاي‌ - كوي‌ قوپاردي‌:

 ياريم‌ ساعات‌ تئز گليبدير

 دئديلر آغ‌ ميدانا،

 بئله‌ ليك‌له‌ ياريش‌ يئري‌،

 وطن‌ اولموشدور اونا.

 سوكوت‌ چؤكدو،

 هامي‌ سوسدو،

 دوشوندو درين‌ - درين‌.

 قضاوتي‌ باطل‌ اولدو،

 بودليل‌له‌ داورين‌.

 

«دة‌ او نه‌ دير؟» 

 اولدوزلارين‌ آراسيندان‌

 منه‌ باخير يانا – يانا،

 من‌ قاچاندا اودا قاچير

 ديغيرلانا، ديغيرلانا.

 من‌ گئده‌نده‌ اودا گئدير

من‌ دوراندا اودا دورور،

 نئچه‌ ساعات‌ اويناييريق‌

نه‌ تؤوشه‌ يير، نه‌ يورولور.

 او گلنده‌ گؤيون‌ اوزو

اولدوز - اولدوز چيچك‌ آچير،

 نوبه‌ - نوبه‌ گونش‌ ايله‌

يئر اوزونه‌ شفق‌ ساچير.

 او گلنده‌ گونش‌ گئديب‌

«گون‌ باتان‌» دا سؤنوب‌ باتير،

 گونش‌ گلجك‌ اودا گئديب‌

داغ‌ داليندا گيريب‌ ياتير.

 

«زَمي‌» 

 بير گؤزو يئرده‌دير،

 بير گؤزو گؤيده‌.

 آتام‌ نیگراندير،

 آتام‌ نیگران‌.

 اكيبدير زمي‌سين‌،

 مين‌ زحمت‌ايله‌.

 قورخور قوراقليقدان‌،

 قورخور دولودان‌

منيم‌ده‌ زميم‌ وار،

 ياشيل‌، يام‌ - ياشيل‌

 نه‌ يئره‌ باخيرام‌،

 نه‌ بولودلارا،

ايسته‌يير ياغماسين‌،

 ايسته‌يير ياغسين‌.

 منيم‌ زميم‌ هارا،

 اونونكو  هارا!

نه‌ سوسوزدان‌ يانار،

 نه‌ دولو وورار.

 اونو من‌ بيچمه‌ره‌م‌،

 اؤلسَم‌ آجيمدان‌.

اونو گؤيَرتميشم‌،

 آغ‌ بير كاغازدا،

 ياشيل‌ میداديمين‌،

 ياشيل‌ اوجوندان‌.

 

 «پاييز» 

 هاوا سرينله‌دي‌

چاتدي‌ ياي‌ باشا،

 بوياندي‌ طبيعت‌

الوان‌، تاماشا.

 دئمك‌ پاييز اولدو،

آچدي‌ مدرسه‌،

 اوشاقلار هاي‌ - كوي‌له‌

 باشلادي‌ درسه‌.

 كؤلگه‌لر اوزاندي‌،

 گونلر قيسالدي‌،

 گونش‌ شعاعلارين‌

 چارچارپاز سالدي‌.

 اييده‌لر قيزاردي‌،

 هئيوا سارالدي‌

 داغلارين‌ ديك‌ باشين‌

 دومانلار آلدي‌،

 دريلدي‌ مئيوه‌لر،

پوزولدو، باغلار،

 مين‌ رنگه‌ بوياندي

‌ باغدا يارپاقلار.

 بولودلار، دومانلار

 ياناشدي‌ داغا

 ائلاتلار اؤزقويدو

 يئنه‌ قيشلاغا.

 آراندا گؤيردي‌

 يئنه‌ده‌ اوتلار

 قويونلار، قوزولار

 چیمن‌ده‌ اوتلار

 داغليق‌ منطقه‌دير

 بيزيم‌ يئريميز.

 ياناجاق‌ فيكرينده‌

اولمالي‌ييق‌ بيز.

 گاهدان‌ ياغيش‌ ياغير،

 گاهدان‌ يئل‌ اسير

 سويو دوندورماغا

هاوا تله‌ سير.

 بير آدي‌ «پاييز» دير،

 بير آدي‌ «گؤز» دور

 بو فصله‌ «سون‌ باهار»

 دئسك‌ده‌ دوزدور

 پاييزدا دئينده‌

 قيشين‌ قارداشي‌

 آغارير پاييزدا

داغلارين‌ باشي‌.

 

 

 

 

  
نویسنده : negar sheyda ; ساعت ۱:٠۸ ‎ق.ظ روز دوشنبه ٢۱ دی ،۱۳۸۳
تگ ها :

اوشاقلار باغچاسی / ۳/ حبيب فرشباف

«كپنك‌»

 

 چيچكلرين‌ رنگين‌ يالار كپنك‌،

 هر چيچكدن‌ بير رنگ‌ آلار كپنك‌.

 گؤزه‌ل‌ اولار، گويچك‌ اولار كپنك‌،

اؤزوده‌ بير چيچك‌ اولار كپنك‌.

 قاناديندا گيرده‌، گيرده‌ خالي‌وار ،

قاراسي‌ وار، ساريسي‌وار، آلي‌وار.

 او هر يئردن‌ باغچا- باغي‌ چوخ سئوه‌ر ،

اوشاقلارلا اويناماغي‌ چوخ‌ سئوه‌ر.

 اوچار، اوچار دوز چاتاندا يول‌ اوسته‌

 گليب‌ قونار چيچكلي‌ بير كول‌ اوسته‌.

 قانادلارين‌ گاه‌ اوجالدار، گاه‌ يايار ،

كول‌ اوستونده‌ بير چيچگه‌ اوخشايار.

 بير اوشاق‌دا اونو گؤروب‌ سئوينر،

گئده‌ر توتسون‌ قلبي‌ گوپ‌- گوپ‌ دؤيونر.

 بارماغي‌نين‌ دوز اوجوندان‌ قالخار او ،

اوشاغي‌دا يانديرار او، ياخار او.

 بوردان‌ اورا، اوردان‌ اورا هئي‌ اوچار،

اوشاق‌ اونون‌ داليسيجا هئي‌ قاچار.

 تؤوشر - تؤوشر اَلي‌ اوزاناق‌ قالار ،

دوروب‌ اونون‌ داليسيجا يالوارار:

 گئتمه‌، گئتمه‌ آي‌ قانادلي‌ چيچه‌ييم‌ !

كوسمه‌ مندن‌ منيم‌ گؤزه‌ل‌ گؤيچه‌ييم‌!

 قورخورام‌ كي‌ اودو ايشيق‌ ساناسان‌،

 گئديب‌ گيريب‌ اود ايچينده‌ ياناسان‌.

 شاملار آغلار سنه‌ تؤكر گؤز ياشي‌،

 من‌ ده‌ ياننام‌ شاملار ايله‌ ياناشي‌.

 آياقلارين‌ ايپكدن‌دير كپنك‌!

قانادلارين‌ چيچكدن‌دير كپنك‌!

 كاش‌ كي‌ سني‌ بيرجه‌ دفعه‌ توتايديم‌ ،

گيرده‌، گيرده‌ خال‌ لاريندان‌ اؤپيديم‌.

 يالواريرام‌ يولون‌ دوشسه‌ تبريزه‌

 بير آخشام‌ دا يئنه‌ فوناق‌ گل‌ بيزه‌!

 

«اليم‌ ايله‌ آياغيم‌»

 بو اَليم‌دير، بو آياغيم‌،

 بو گؤزوم‌دور، بو قولاغيم‌.

 گؤزلريم‌له‌ من‌ گؤره‌رم‌،

 قولاغيم‌لا ائشيدَه‌رم‌.

 گؤرسم‌ هاردا شوگالات‌ وار

 آياقلاريم‌ دورماز قاچار.

 اللريم‌له‌ سويارام‌ ،

تئز آغزيما قويارام‌.

 

 «قيزيم‌»

 

 قيزيم‌، قيزيم‌، آي‌ قيزيم‌!
 اولدوز قيزيم‌، آي‌ قيزيم‌!
 آتان‌ ايشدن‌ گليبدير
 دور گتير بير چاي‌ قيزيم‌!

«تولكو ايله‌ قارقا»

 

 بير قارقا اوچا - اوچا

پنير گوردو بير پارچا،

 قوندو آغزينا آلدي‌،

يئنه‌ده‌ قاناد چالدي‌.

 يول‌ اوسته‌كي‌ چینارا

قوندو او آلا قارقا.

 چینارين‌ كؤلگه‌سينده‌

 چیمنلرين‌ اوستونده‌

 بير تولكو مورگولوردو،

قارقا اونا گولوردو.

 تولكو قالخيزدي‌ باشين‌،

قارقايا چاتدي‌ قاشين‌.

 سونرا گؤره‌ك‌ نئيله‌ دي‌

او قارقايا سؤيله‌دي‌:

 

 ـ سن‌ نه‌ قشنگ‌سن‌ آ قوش‌ !

سن‌ نه‌ ملك‌سن‌ آ قوش‌!

 رنگين‌ نه‌ قَمَري‌ دير

با خاندا غم‌ اَريدير!

 آياقلارين‌ اينجه‌دير ،

اولدوز گؤزلرينجه‌دير،

 سسين‌ نئجه‌دير گولوم‌

بير اوخو من‌ده‌ بيليم‌!

 

 قارقا حيله‌ني‌ دويدو

پنيري‌ يئره‌ قويدو،

 ديرناقلاريندا توتدو

اوچو ساينجا اوتدو،

 ديمدي‌يين‌ چكدي‌ يئره‌

اوخودو بيردن‌ بيره‌:

 

 عزيزيم‌ حيله‌ كارا

 اولمادي‌ حيله‌ كارا

 كئچدي‌ پخمه‌ زاماني‌

 تولكو گزمه‌ بئكارا !

 تولكو اَيري‌ - اَيري‌ باخدي،

‌ گؤزلريندن‌ ياش‌ آخدي‌.

 اَله‌ آلماقچون‌ اؤزون‌

 تولكو زمزمه‌ ائتدي‌

 بؤيوك‌ صابرين‌ سؤزون‌:

 «اوندا كي‌ اولاد وطن‌ خام‌ ايدي‌

 آخ‌ نئجه‌ كئف‌ چكمه‌لي‌ ايام‌ ايدي‌»

 

«گونش‌ ايله‌ قار»

 

 قاپيميزا قار ياغدي‌،

 قارين‌ رنگي‌ دوم‌ آغدي‌.

 من‌ قاپيدان‌ باخيرديم‌

 دوستلاريمي‌ چاغيرديم‌،

 بيز اولدوق‌ دسته‌ - دسته‌

 زوي‌ - زوي‌ گئتديق‌ بوز اوسته‌،

 قار توپودا اويناديق‌،

آنجاق‌، حاييف‌ دويماديق‌.

 گونش‌ چيخدي‌ پارلادي‌

 قار اريدي‌، قالمادي‌.

 


 

«آتام‌ بئكاردير»

 

 اوندا آتامين‌ ايشي‌ وارايدي‌

 منه‌ آلاردي‌ چوخلو اويونجاق‌؛

 ايندي‌ بئكاردير پولو يوخ‌ آنجاق،‌

 ايش‌ تاپسا، منه‌ باشماق‌ آلاجاق.‌

 

 

 

  
نویسنده : negar sheyda ; ساعت ٢:۳۳ ‎ق.ظ روز پنجشنبه ۱٩ شهریور ،۱۳۸۳
تگ ها :

اوشاقلار باغچاسی / ۲/ حبيب فرشباف

«پيشي‌ييم‌»

 

 من‌ يئديكجه‌ حسرت‌ - حسرت‌ باخيرسان‌،

 اوره‌ييمي‌ يانديريرسان‌، ياخيرسان‌.

 هئي‌ يالوارما: ميیو - میيو، پيشي‌ييم‌!

 اوّل‌ گئديب‌ اللرين‌ يو پيشي‌ييم‌!

 سونرا گليب‌ هئي‌ ديزيمدن‌ ويرگينان‌

من‌ ده‌ دئييم‌: پيشي‌ييم‌ بويورگينان‌!

 

 

 «منيم‌ قيزيم‌»

 

 واختيندا ياتار،

 واختيندا دورار،

 گونده‌ اوچ‌ دفعه‌

ديشلرين‌ يويار،

 واختيندا يئيه‌ر

 صبحانه‌ سيني‌،

 واختيندا يازار

اوخور در سيني‌.

 مخصوص‌ يئري‌ وار

 كتابـــلاريـنـين‌،

 يئرينه‌ ييغار

او هربير زادين.‌

 قوناقدان‌ آلماز

 تئز قولچا قلارين،‌

 ياخشي‌ ساخلايار

 اويونجاقلارين‌.

 او آناسينا،

كومك‌ده‌ ائده‌ر،

 بونونچون‌ اونو

هامي‌ چوخ‌ سئوه‌ر.

 

 «توك‌ يارپاقلي‌ آغاجلار»

 

 تؤكولدو بيرجه‌ - بيرجه‌

آغاجلارين‌ يارپاغي‌،

 الوان‌ رنگه‌ بوياندي‌

باغ‌ - باغاتين‌ تورپاغي‌.

  گونشين‌ قارشي‌سيندا

 چيل‌ - چيلپاق‌ دايانديلار،

 كؤلگه‌لرين‌ گؤرنده‌

 لوتلوقدان‌ اوتانديلار.

 سئرچه‌لر پيريل‌ - پيريل

‌ بوداقلارا ائنديلر،

 توك‌ يارپاقلي‌ بوداقلار

 ايسينيب‌ سئوينديلر.

 

 «تنبل‌ حسن‌»

 

 بير اوغلاندير تنبل‌ حسن‌

نئجه‌ تنبل‌ گَل‌ گؤره‌سن‌!

 اَلي‌ قارا، اؤزو قارا

 شالوارينين‌ ديزي‌ قارا.

 اوزون‌ يوماز سحر – سحر،

مدرسه‌يه‌ بئواخت‌ گئده‌ر.

 او مشقيني‌ غلط‌ يازار،

توپورجكله‌ سيليب‌، پوزار.

 میدادلارين‌ هئي‌ قاتدايار،

 مشق‌لرين‌ شولاتدايار.

 معلّیمي‌ دئيه‌ر ديكته‌،

او صفر آلار كوفته-‌ كوفته‌.

 بير اوغلاندير تنبل‌ حسن‌،

نئجه‌ تنبل‌ گل‌ گؤره‌سن‌!

 ائولرينده‌ بيرايش‌ گؤرمز،

 درس‌ لرينه‌ فيكير وئرمز.

 گئجه‌ گوندوز توپ‌ اوينايار،

 هر كیلاسدا اوچ‌ ايل‌ قالار.

 كیتابلاري‌ جيريق‌ - جيريق،‌

 اوستو- باشي‌ شيره‌- شيرتيق‌.

 او آينايا باخسا اگر

آيناني‌دا چيركه‌ چكر.

 بير اوغلاندير گوزه‌ل‌ گؤيچك‌،

 اؤزو - گؤزو دولو ميلچك‌.

 

 

 «سوت‌»

 

 مه‌لر، مه‌لر قويونوم‌

 داغدان‌ گلر قويونوم‌.

 آنام‌ ساغار سوتونو،

 دولار بايدا بوتونو.

 سَحر سوتو يئيه‌رَم‌،

آنا ساغ‌ اول‌ - دئيه‌رم‌!

 

 


 

 «قويونوم‌»

 

 گئديب‌ داغا قويونوم‌ ،

اوتلاماغا قويونوم‌.

 يايلاقلاردا حاللانار،

 تؤكو يئره‌ ساللانار.

 آتام‌ قيرخار توكونو ،

يونگولله‌د‌ر يوكونو.

 آنام‌ اونون‌ يونوندان

‌ منه‌ تيكَر بير يورقان.‌

 

 «گولوشوم‌ آغ‌ - آبّباغ‌»

 

 كئفيم‌ سازدير، آلنيم‌ آچيق‌ اوزوم‌ آغ‌،
 اللريم‌ آغ‌، ديشلريم‌ آغ‌، اوزوم‌ آغ‌.
 تنبل‌ليگه بولانميشدي‌ ايشلريم‌،
 هيچ‌ يومازديم‌ قاپ‌- قارايدي‌ ديشلريم‌.
 اوره‌ييمده‌ ساخلاميشديم‌ آرزيمي‌،
 گولمه‌گه‌ده من‌ آچمازديم‌ آغزيمي‌.
 فيرچالاديم‌ سحر، آخشام‌، هر گئجه،‌
 پيس‌ ايي‌ گلمز ديشلريمدن‌ اينديجه‌.
 گلين‌ باخين‌ ديشلريم‌ آغ‌، اوزوم‌ آغ‌!
 گولوشوم‌ ده‌ آغ‌ - آبّباغ‌ دير، آغ‌ - آبّباغ‌!

«يايلاق‌»

 

 ائل‌ چيخاندا يايلاغا

ياماجلاردا گول‌ آچار،

 ائل‌ چيخاندا يايلاغا

 بولاقلاردا، ديل‌ آچار.

 

 قويون‌ - قوزو اوتلايار

 چیمنده‌ دسته‌- دسته‌،

 چوبان‌ چالار توتَه‌يين‌

 چاتاندا بولاغ‌ اوسته‌.

 

 دومان‌ آلار داغلاري‌

 گاه‌ ياتار، گاه‌ اوينايار،

 توسدوله‌ين‌ اوجاقدا

 قارا چايدان‌ قاينايار.

 

 آينا كيمي‌ پاريلدار

دره‌ لرده‌ صاف‌ سولار،

 اؤز عكسينه‌ باخاندا

حئيران‌ اولار قوزولار.

 

 آنام‌ تيكر گؤزونو

هر گون‌ آخشام‌ يوللارا،

 قاباقدا گلن‌ قويون‌

بودور قارادير، قارا.

 

 «دوغوم گونون‌ مبارك‌»

 

 گؤزه‌ل‌ بالا شمعي‌ پوله‌

شيرنيني‌ كس‌ گوله‌ - گوله‌!

 بئش‌ ياشيني‌ وئردين‌ باشا ،

بو گون‌ گيردين‌ آلتي‌ ياشا.

 موباركدير تازا ايلين،‌

سن‌ عؤمور سور شيرين‌ - شيرين!‌

 ايل‌لر يئل‌ تك‌ گليب‌ گئده‌ر،

سن‌ عؤمرونو ائتمه‌ هده‌ر.

 هنر گؤستر، ياشا، يارات‌ !

آرزوم‌ بودور: آرزونا چات‌!

 قوللوق‌ ائتسَن‌ سن‌ وطنه‌

 فخر ائده‌جك‌ ائل‌لر سنه‌.

 قوي‌ سويله‌سين‌ اوبان‌ ائلين‌،

 ـ موباركدير تازا ايلين‌!

 

 

  
نویسنده : negar sheyda ; ساعت ۱:٥٦ ‎ق.ظ روز پنجشنبه ۱٩ شهریور ،۱۳۸۳
تگ ها :

اوشاقلار باغچاسی / ۱/ حبيب فرشباف

 

 

 اوشاقلار باغچاسي‌

(شعرلر)

 

 

حبيب‌ فرشباف‌

 


 

 

 

 

 

«باليق‌ اولاجاغام‌»

 

 آنا مني‌ اوياتما

من‌ هله‌ ده‌ ياتميشام‌،

 شيرين‌ يوخولاريم‌لا

هئي‌ باشيمي‌ قاتميشام‌.

 اَل‌ - اوز يوماق‌ درديندن‌

دورانميرام‌ يوخودان‌،

 آنا بيلميره‌م‌ نه‌ دن‌

يامان‌ قورخورام‌ سودان‌!

 خئيري‌ اولسون‌ باليغين‌

 گئجه‌ - گوندوز اوينايير،

 نه‌ يوخودان‌ دوراندا

 گئديب‌ ال‌ - اوزون‌ يويور.

 نه‌ هر غذادان‌ سونرا

يويا جاقدير ديشلرين‌،

 او اوينايا - اوينايا

گؤرور تامام‌ ايشلرين‌.

 آنجاق‌ بو ايشلر ايچون‌

 مني‌ سئومه‌ يير آتام‌،

 من‌ ده‌ تنبل‌ليگيمدن‌

بير باليق‌ اولاجاغام‌.


 

 

 

 «باهار»

 

 باشيم‌ اوسته‌ گونشين‌

ساچاق‌ - ساچاق‌ تئل‌لري‌،

 نفسيمدن‌ گئده‌ جك‌

قارين‌، بوزون‌ اثري‌.

 آياغيم‌ آلتدا چيمن‌

 اَتگيمده‌ گول‌ - چيچك‌،

 قارانقوشلار قاييدير

ائل‌لر اولور سئوينجك‌.

 ياغيش‌ ياغير، گون‌ چيخير

تاغ‌ قورور گؤي‌ قورشاغي‌،

 سئل‌لر، سولار شاريلدير

دره‌لردن‌ آشاغي‌.

 كاروان‌ - كاروان‌ آغ‌ بولوت‌

ماوي‌ گؤيده‌ دوزولور،

 ديمديگيندن‌ قوشلارين‌

بال‌ نغمه‌لر سوزولور.

 چيچكلرين‌ عطريندن‌

 فرحله‌ نيب‌ بير آندا،

 تازا پالتار گئييرلر

طبيعت‌ ده‌، انسان‌ دا.

 فروردين‌، ارديبهشت‌،

 خرداد منيم‌ اوچ‌ آييم‌.

 باهارام‌ من‌، باهارام‌،

 گوزه‌ل‌ ليكده‌ يوخ‌ تاييم‌.

 

 

 «ياي‌»

 

 نه‌ بولود وار، نه‌ دومان‌،

ماوي‌ گؤيده‌ گون‌ شاخير؛

 هاوانين‌ ايستي‌ سيندن‌،

 اوز - گؤزومدن‌ تَر آخير.

 دَنه‌ دولوب‌ سارالدي‌،

دالغالاندي‌ سونبول‌لر،

 آرمود، اَريك‌ يئتيشدي‌،

مئيوه‌ اولدو آغ‌ گول‌لر.

 ياماجلاري‌ چيمن‌دن‌

ياشيل‌لاشدي‌ داغلارين‌،

 آغاجلاري‌ مئيوه‌ دن‌

اَلوان‌لاشدي‌ باغلارين‌.

 باش‌ اَگديلر بوداقلار

 قودرتينه‌ توپراغين‌.

 ييغيلديلار سئرچه‌لر

كؤلگه‌سينه‌ ياپراغين‌،

 كؤچوب‌ گلدي‌ ائلاتلار

 قيشلاقلاردان‌ يايلاغا،

 باشلاديلار اوشاقلار

چايدا، گؤلده‌ اوزماغا.

 تير، مرداد، شهريورم‌،

 باهار تك‌ اوچ‌ آيام‌ من‌.

 ايلين‌ لاپ‌ ايستي‌ فصلي‌،

 محصول‌ فصلي‌ يايام‌ من‌.

 

«پاييز»

 

 بوز افوقدن‌ بويلانير

سولغون‌ گونش‌ ساپ‌ ساري‌؛

 غملي‌ - غملي‌ كؤچورلر

 دورنالارين‌ قاتاري‌.

 باشا چاتدي‌ ياي‌ فصلي‌

يئنه‌ آچدي‌ مدرسه‌،

 كلاسلاردا اوشاقلار

يئنه‌ وئردي‌ سَس‌ سَسه‌.

 كولك‌ اَسدي‌ قوپاردي‌

ياپراقلاري‌ بوداقدان‌،

 بير پارچاسي‌ نارینجي‌

بير پارچاسي‌ آل‌ - اَلوان‌.

 نَفَسيندن‌ آغ‌ يئلين‌

سولدو چيمن‌، سولدو گول،‌

 هيجرانيندان‌ بولبولون‌

ياپراقلارين‌ يولدو گول‌.

 شئه‌ چؤكوبدور چیمنه‌،

 دومان‌ بورويوب‌ داغي،‌

 توسدوله‌يير چوبانين‌

ياش‌ تيكانلي‌ اوجاغي‌.

 كاروان‌ - كاروان‌ قاپ‌- قارا

 گؤيده‌ بولودلارا باخ‌!

 بوداقلاردان‌ سال‌لانان‌

قيپ‌ - قيرميزي‌ نارا باخ‌!

 مهر، آبان‌، آذرم‌

 چن‌ - دومان‌ نَفَسلي‌يم‌؛

 من‌ پاييزام‌ رنگلرين‌

 مئيوه‌لرين‌ فصلي‌يم‌.

 


 

 

 

 «قيش‌»

 

 گيزله‌ديبدير گونشي‌

قارا بولوت‌ لاي‌ با لاي‌،

 شاختاسيندان‌ هاوانين‌

دوندو بولاق‌، دوندو چاي‌.

 گؤيدن‌ ياغان‌ پامبيقلار

آغارديبدير باشيمي،‌

 قارلي‌ ساچيم‌، ساققاليم‌

چوخ‌ گؤسته‌رير ياشيمي‌.

 آغ‌ پالتاريم‌ گؤرنده‌

هامي‌ دئيير - قيش‌ - منه‌،

 اوشوينده‌ اَل‌لري‌

ائديرلر قارقيش‌ منه‌.

 يون‌ پالتارلار گئييرلر

ائولرده‌ده‌ پینج يانير،

 آنجاق‌ لوت‌دور آغاجلار

قار ياغديقجا ايسلانير.

 قاردا دوندو شاختادان‌

يئنه‌ده‌ ياغ‌ تزه‌ قار!

 مئشه‌لري‌، داغلاري‌

 آغ‌ اؤرتوكله‌ بزه‌ قار!

 قوي‌ اوشاقلار سئوينجك‌

 قار آدامي‌ دوزلتسين‌،

 قار گولله‌سي‌ اويناسين‌

 زوي‌ گئديب‌ شادليق‌ ائتسين‌.

 دي‌، بهمن‌، اسفند منم‌

 قارلي‌ قيشام‌، قارلي‌ قيش،‌

 ايلين‌ قوجا فصلي‌يم‌

 ساچ‌ ساققاليم‌ آغارميش.‌

 

 

 «مستان‌ پيشيك‌»

 

 آي‌ پيشي‌ مستان‌ پيشي‌!

 گوزلري‌ مرجان‌ پيشي‌!

 گاه‌ ياتيرسان‌ اويورسان‌،

 گاه‌ اوزونو يويورسان‌؛

 میيو میيو ائديرسن‌،

 اللريمي‌ ديديرسن‌.

 

 

  
نویسنده : negar sheyda ; ساعت ٤:۱٢ ‎ق.ظ روز یکشنبه ۱۱ امرداد ،۱۳۸۳
تگ ها :

 

باهار نغمه لري 

ائلدار موغانلي- 1366                             

 

 آنا وطن

 

"دوغما آنامسان منيم

اي مهريبان وطنيم"

 

عشقينده گره ک يانام

سنسن مهريبان آنام.

مني بسله ين ده سن

مني سسله ين ده سن.

"دوغما آنامسان منيم

اي مهريبان وطنيم"

 

تورپاغيندان گوج آلديم

شؤهرتينله اوجالديم.

سنده‌دير شان- شؤهرتيم

اي اولوي محببتيم!

"دوغما آنامسان منيم

اي مهريبان وطنيم"

 

نه قده‌ر کي جانيم وار

ايلي‌ييم وار، قانيم وار

سئوه‌جه‌يم سني من

لاپ اوره‌کدن اي وطن!

"دوغما آنامسان منيم

اي مهريبان وطنيم"

 

گؤیرچین

منیم آدیم گؤیرچین

قانادلاریم چین به چین.

 

ماوی سما مکانیم

آغ بولوددور هر یانیم.

 

قارانلیقدان بئزارام

گئجه‌یله یوخدور آرام.

 

ایسته‌رم کی هر زامان

نه چن اولا نه دومان.

 

سما اوزو آچیلا

دونیایا نور ساچیلا.

 

یئر اوزو باشدان باشا

چیچک‌له دولوب داشا.

 

باغلاردا گوللر اچا

دوزلرده مارال قاچا.

 

نغمه‌لر سوزه دیلدن

غم سیلینه کؤنولدن.

 

هامی سئوینه گوله

شنلیک یاییلا ائله.

 

گونش گویده نور ساچا

آرزولاریم گول آچا.

 

.من‌ده گزه‌م سمانی

شاقراق گؤرم هر یانی.

 

اوندادیر کی دئیه‌رلر-

منه هر آخشام – سحر:

- ای قانادی چین به چین

آغ کؤینکلی گؤیرچین!

قاناد آچ گؤیده دولان

سن باریشیق قوشوسان!

 

 باهار گلير

 

شنليک نورو تؤکولور

آل گونشين گؤزوندن

دره گولور داغ گولور

"باهار گلير" سؤزوندن؛

اري يير داغلاردا قار

اؤزون يئتيريب باهار

شنليک ائدين اوشاقلار!

 

چيخيبدير استيقبالا

لاله  ,  نرگيز  ,  بنؤوشه؛

باخ ! دوشور حالدان  حالا

گوللو باغچا, سيخ مئشه؛

قوشلار ائتميره آه زار

اؤزون يئتيريب باهار 

شنليک ائدين اوشاقلار!

 

گيئيبدير ياشيل دونون

جاوان لاشيب طبيعت

اوره يينده وار اونون

اودو سؤنمز محبت

گزير او ديار  ديار

اؤزون يئتيريب باهار

شنليک ائدين اوشاقلار!

 

گزير تاپا سئوگيلين

ياشايالار سئوينجک؛

باهار دير گؤيچک گلين

اونا باغلاييب اوره ک؛

اولوي دير بو پاک ايلقار

اؤزون يئتيريب باهار

شنليک ائدين اوشاقلار !

  

قوي بيزيمده قلبيميز

سئوسين سئويلسين هر آن؛

طبيعتي سئوه ک بيز

سئو گي دن يارانير جان؛

شيرينله شير آرزولار

اؤزون يئتيريب باهار

شنليک ائدين اوشاقلار!

 

ياز گلسين کؤنول لره

نغمه دئسين دوداقلار؛

يول وئرمه يک کدره

سئوگيميز اولسون باهار

شنليک ائدين اوشاقلار!

 

 

 قيرميزي پياله

 

من داغلارين قيزي يام

آل- قيرميزي دونوم وار،

قان کيمي قيرميزي يام

مني سئوه ر شن باهار.

 

دونوم داغ ياراشيغي

اؤزوم ياماجا بزه ک،

رنگيم گونش ايشيغي

گؤرونورم شفق تک.

 

آديمي بيلدينيزمي-

آي مهربان اوشاقلار !؟

قيرميزي يام قان کيمي ،

منله گؤزه لدي داغلار...

 

بيلمه دينيز؟

  قوي دئيم :

-قيرميزي پياله يم.

باهار فصلي گلر کن

داغدا آچان لاله يم .                                              

 

 ياشاسين باهار

آييليبدي يئر،

هر يان گؤزه لدير.

آنا طبيعت

اؤلوبدو جنت.

هريان گول- -چيچک،

گؤزلدي ، گؤيچک؛  

  ياشاسين باهار !

 

گؤم- گؤيدور چمن؛

آچيب ياسمن.

قيزارير لاله،

آخير شلاله.

دوم- دورو آخار

جوشغون بولاقلار؛

ياشاسين باهار !

                 

گوللرين چتري،

تورپاغين عطري،

ياشيل مئشه لر،

آيدين بير سحر،

گؤزه ل گؤيچک دي،

يوردا بزه کدي؛

ياشاسين باهار!

ياشاسين باهار !

 

 

  
نویسنده : negar sheyda ; ساعت ٢:٥٠ ‎ق.ظ روز سه‌شنبه ۸ اردیبهشت ،۱۳۸۳
تگ ها :

بيرينجی سؤز / يادداشت اول

بو وبلاگدا آذربايجان و دونيا‌نين باشقا ديللرينده يازيلان اوشاق ادبياتی اثرلرينه يئر وئريله‌جک . سيز عزيز‌لردن گوندريلن اثرلرين‌ده اوزونه مخصوص يئری واردير. بيزی اونوتمايين . بيزه ساری اوزانان اللرينيزی محبت‌له سيخيريق.

تشکورلر

*********************************
در اين وبلاگ آثار ادبيات کودکان بزبان آذربايجانی و ديگر زبانها ارائه خواهد شد. آثار ارسالی شما عزيزان جايگاه ويژه خود را خواهد داشت. دست ياری شما را به گرمی می‌فشاريم.

با تشکر

  
نویسنده : negar sheyda ; ساعت ۸:٥۸ ‎ب.ظ روز سه‌شنبه ۱٢ اسفند ،۱۳۸٢
تگ ها :